А. Н. Явловскай аатынан Сылгы-Ыытардаа5ы орто оскуолаҕа сайын аайы ѳрѳмүѳн үлэтигэр үгэс быһыытынан   былааннаах үлэ ыытыллар. Ол курдук, ааспыт сылга алын кылаастар үѳрэнэр куорпустарын муостата бүттүннүү кѳтүрүллэн, нэһилиэнньэ кѳмѳтүнэн буор толору кутуллубута. Ити ыытыллыбыт үлэ үтүѳ түмүктэри кѳрдѳрѳн, бу куорпуска кыһыны сылаастык туораабыттара. Онтон бу үѳрэх сылыгар эмиэ тустаах үлэ былаана ылыллан, атырдьах ыйыгар оскуола иккис куорпуһун муостата кѳтүрүллэн бэлэмнэниллибитэ. Манна олохтоох администрация дьаһалынан уонча прицеп буор тиэллибитэ.  Атырдьах ыйыгар субботникка ыҥырыы ылан, дьон- сэргэ бука бары олус кѳхтѳѳхтук, күргүѳмүнэн саба түһэн, үлэни бэрт түргэнник үмүрү туттулар.  Ону таһынан ЖКХ, администрация кѳмѳлѳѳн, биир куорпуска ититии ситимэ саҥардылынна. Онон былааннаммыт үлэ бириэмэтигэр хаачыстыбалаахтык толорулунна. Дьэ, итини этэн эрдэхтэрэ «Норуот күүһэ- кѳмүѳл күүһэ» диэн. Манна даҕатан эттэххэ, тѳрѳппүт, Бекренёв Дмитрий Иванович оскуолаҕа хортуоска олордорго үс прицеп ноһуому босхо аҕалан түһэрбитэ улахан үѳрүүлээх, хайҕаллаах. 

Ону таһынан, атырдьах ыйыгар билиҥҥи тирээн турар ыарахан балаһыанньаннан сибээстээн. Ѳрѳспүүбулүкэ иһигэр олорор биир дойдулаахтарбыт, эр дьон түмсүүлэрэ бары биир сүбэннэн тѳрѳѳбүт дойдуларыгар кѳмѳ-тирэх буолар санааны ылыммыттара. Ол түмүгэр материальнай кѳмѳ оҥоһуллан нэһилиэккэ бастакы партия 600 маасканы уонна 16 харыстанар антисептиктары туттардылар. Сотору кэминэн иккис партияны кэтэһэбит. Бу кѳмѳ кэлэр кэнчээри ыччаттарбытыгар о.э. олохтоох дьааһыла саадыгар, орто оскуолаҕа бэрилиннэ. Онон оҕолорбут ѳйѳбүллээх, харысхаллаах буолан үѳрүүлэрэ үксээтэ. Түмүккэ, кѳмѳ-тирэх буолар бар дьоммутугар оскуола педколлективын, үѳрэнээччилэрин аатыттан сүһүѳхтээх бэйэбит сүгүрүйэн туран барҕа махталбытын тиэрдэбит.